تحضير دجاج كنتاكي في البيت كل الأسرار يكشفها الشيف بلال
المقادير :-
البهارات ل1 كيلو دجاج
ملعقة كبيرة ملح.
ملعقة كبيرة بابريكا حد.
نصف ملعقة كبيرة كركم.
نص ملعقة كبيرة ماجي.
نصف ملعقة كبيرة كاري.
نصف ملعقة كبيرة توم بودرة.
نصف ملعقة كبيرة بصل بودرة.
ربع ملعقة كبيرة زنجبيل.
ربع ملعقة كبيرة هيل مطحون
ربع ملعقة كبيرة فلفل أبيض.
ملعقة كبيرة صوص صويا.
رشة خل.
4 ملاعق لبن أو ماء.
الخليط السائل :
نصف لتر ماء.
بيضة.
رشة خل.
ملعقة بهارات.
نصف ظرف فانيليا.
التتبيلة الجافة :
5 كاسات طحين نصف كيلو.
نصف كاسة نشاء 50 غ.
ظرف بیکنغ بودر.
ظرف فانيليا.
ملعقة كبيرة بهارات.
طريقة التحضير :-
أولا نجيب الدجاج ونقطع الاجنحة وإذا في ريش ننظفهم ونقطع المفصل.
من ثم يجب علينا أن ننظفه ، بصحن نحط المي والخل والملح ، نجيب الدجاج ونثقبه بالسكين حتى تدخل التتبيلة وتتغلل جواتها.
في نفس الوقت نجهز التتبيلة :
بصحن نحط الملح والبابريكا والكركم والكاري والماجي والبصل والتوم البودرة ، والهيل المطحون والزنجبيل والفلفل الأبيض ، ممكن نستبدله بفلفل أسود لو مو متوفر ولكن الأبيض أفضل. نخلطهم ونشيل منهم معلقتين على جمب.
نضيف فوق البهارات الي خلطناهم الخل وصوص الصويا ، لنكير البهارات شوي نحط حليب أو لبن أو ماء ، نخلطهم وهيك صارت التتبيلة جاهزة.
بعد ماصفينا الدجاج ننقعهم بالتتبيلة ، ويجب علينا أن نتركهم لتاني يوم ، إذا مافي وقت أقل شي نتركهم 3 ساعات حتى ياخذو التتبيلة والنكهة.
من ثم نقطع البطاطا وننقعهم بماء وملح وخل حتى تعطيها قرمشة ومايسود لونها إلى ان يحين وقت قليها.
لتحضير خلطة الطحين :
بصحن نضيف الطحين ونضيف النشا وملعقة البهارات إلي شلناها على جمب ، نضيف الفانيلا لتعطي ريحة ظريفة ونكهة طيبة وتخفي زنخة الدجاج ، وهي سر البروستد وريحة المطاعم بتكون ريحة الفانيليا بقلب الطحين عم تتقلى بخلطة الطحين. أخيرا بنضيف البيكنغ بودر حتى تعطي نفشة للحراشف والطحين.
لتحضير الخليط السائل :
نخلط ماء والبيض وملعقة البهارات والخل والفانيلا.
نجهز الدجاج والخليط السائل والطحين على الطاولة حتى نشتغل فورا ، نشغل النار تحت مقلاية فيها زيت وفير حتى يحمى بدرجة متوسطة ، حتى نطحن الدجاج وفورا نقليهم ، مانطحن القطع كلها بعدين نقليهم ، 5 قطع أكتر شي.
طريقة التطحين هي السر ليطلع البروستد معنا بشكل ناجح ، ناخذ القطع المتشابهة متل الأفخاذ مع بعض الأجنحة مع بعض ، ومانكتر 5 حبات أكثر شي ، نحطهم بالطحين ونغطيهم من فوق ونقلبهم تقليبة خفيفة 10 تقليبات ، من ثم ننفضهم نفضة خفيفة ، بعد ذلك نلكها لكة خفيفة بالخليط السائل ونرجع نغطيهم بالطحين ، ونقلبهم 5 تقليبات ونكبس كبسة ضغطة خفيفة ونرجع نقلب مرة أخرى 5 تقليبات ، وهيك صارو جاهزين.
نروح على المقلاية ونتأكد أن الزين حامي بوضع حبة طحين بالزيت إذا فارت وغلت معناها صار تمام. حرارة الزيت تكون وسط لا يكون حامي كتير حتى لاتحرق الدجاج.
نضع قطع الدجاج بالتدريب بين كل قطعة وقطعة دقيقتين حتى ينفردو الحراشف وهكذا حتى تنتهي الكمية.
إذا المقلاية صغيرة مانكتر الكمية 5 قطع تكفي وإلا مابتعطينا النتيجة الي بدنا ياها.
ريثما يتحمرو نجهز القطع التانية ، مع تقليبهم وتحريكهم إذا إحتاجو.
إذا كانت القطع صغيرة متل الأجنحة بتاخذ 11 إلى 12 دقيقة ، أما إذا كانت القطع كبيرة على سبيل المثال صدور أو أفخاذ نتركهم 15 دقيقة.
نصفيهم من الزيت بشكل جيد على شبكة أو مصفاية لمدة 5 دقايق على الأقل حتى يطلع الزيت منهم.
بين قلية وقلية نترك الزيت 3 إلى 5 دقايق يرجع يحمى لأنه رح يبرد من الدجاج.
أيضا نطحّن البطاطا كما عملنا بالدجاج ، نغطيهم بالطحين ونقلبهم تقليبة خفيفة وننفضهم ، من ثم نغمسهم بالخليط السائل ونصفيهم ونرجع نغطيهم بالطحين وأيضا ننفضهم حبة حبة.
نحط البطاطا بالزيت فورا مانتركها وإلا بتروح الحراشف.
أخيرا نقدمهم مع كتشب ومايونيز ونرش عليهم رشة خفيفة من البهارات. وصحة وهنا
