طريقة تحضير اللحمة بالصينية (بالصحن) أسرار يكشفا الشيف بلال عمر
المقادير :
1 كيلو لحم خاروف ( 80% لحم (هبرة) ، 20% لية خاروف (دهون) الأفضل نجمعهم مع بعض ونفرمهم وجهين مرة عالخشن ومرة عالناعم ).
ثلث ملعقة كبيرة فلفل أسود.
نصف ملعقة كبيرة بهار مشكل حلبي.
ملعقة كبيرة ملح.
150 غ بصل مفروم ومعصور (بصلة كبيرة).
حبة بندورة صغيرة.
حبة فليفلة حمرة صغيرة.
بدوة أو صوص اللبن والطحينة.
كاسة لبن.
1 سن ثوم.
فنجان طحينة.
عصير ليمونة.
رشة ملح.
للزينة : بندورة وفليفلة.
للصلصة السحرية : دبس رمان وليمون.
طريقة التحضير:
بصحن بنحط اللحم ونضيف الفلفل الأسود الملح والبهار الحلبي ، بيعطي زكاوة ونكهة للحم وإضافته إختياري ، بنضيف البصل المفروم بالسكين ، بيخلي اللحم يفرط وبيعطي طراوة ، بنخلط حبة بندورة وفليفلة بالخلاط ونضيفهم على اللحمة ، بيعطو نعومة وطراوة ونكهة طيبة ، بندعك اللحمة كتير منيح.
ملاحظة :
ممكن نستعمل لحم عجل ولكن نكتر كمية الدهون ، حيث أن كمية لحم العجل بتكون ⅔ و ⅓ دهون خاروف
ويبقى لحم الخروف أفضل وأزكى.
لحم الخروف البلدي أبو لية مابيحتاج غير ملح وفلفل أسود لأنه لحم زاكي.
أما خروف لحم بيلا ممكن يكون فيه ريحة وطعمة زنخة فنضيف عليه رشه هيل وزنجبيل.
نبلل ايدينا بشوية ماء ونبدأ نفرد اللحمة ، وننتبه ماتكون سميكة كتير حيث أنها يجب تتناسق مع حجم الصينية.
نرفع أطراف اللحمة حول جوانب الصينية مثل ما هو موضح بالفيديو ونرتبها ، حتى تخف كمية اللحمة من نص الصينية ونرجع نرقها أكثر، نشكلها بأي طريقة بنحبها ، بنقدر نشكلها باليد أو ممكن نشكلها مثل صينية البقلاوة مثل ماهو موضح بالفيديو.
وفايدة هي الخطوة أن الخطوط بتخلي قطع اللحمة بشكل صغير فتستوي بسرعة ، والدهون والبهار يفوت داخلها بشكل جيد.
للصينية الأولى ببندورة نقطع الخضار شرائح صغيرة ، نحط البندورة والفليفلة على اللحمة ، وكلما كثرنا خضرة على الوجه أفضل لأنها رح تنزل مي وتعطني نكهة طيبة.
نحمي الفرن على أقوى درجة حرارة ونشغله من فوق وتحت ، نحط الصينية على الرف الأوسط.
وريثما تستوي بنحضر خلطة الطحينة بلبن ، بصحن بنضيف للبن الطحينة والتوم والملح والليمون حسب الرغبة ونخلطهم ، وممكن نضيف دبس رمان أيضا على الخلطة أو بنخليه منفصل مثل ماعملت بالفيديو.
ولنعمل الخلطة السحرية بنخلط شوية عصير ليمون ودبس رمان.
في النهاية بعد ماستوت صينية اللحمة ببندورة نسقّيها بالخلطة السحرية.
من ناحية أخرى
الصينية اللحمة بطحينة نحط عليها صلصة الطحينة واللبن ، وثم نزينها بدبس الرمان.
ملاحظة : اللحمة بالصينية رح تكش و ثم تنكمش بمقدار 2 سم تقريبا لذلك يجب علينا أن نراعي الكمية بالصينية. وصحة وهنا
إلى هنا نصل معكم إلى نهاية وصفتتنا طريقة تحضير اللحمة بالصينية وندعوكم لترك تعليقاتكم على هذا المقال, أو من خلال التعليقات في صفحتنا على فيسبوك, كما ندعوكم للاطلاع على أطيب الوصفات ضمن موقعنا عبر الروابط التالية.
إلى أن نلقاكم بوصفة جدية على خير, وصفة ثم وصفة, نتمنى لكم دوام الصحة والعافية
