طريقة تحضير المعروك بالبيت مثل ما بيعملوها المحلات
من المحلات للبيت المعروك السوري الأصلي بكل أنواعو من اهل الكار
المقادير الخاصة بـ طريقة تحضير المعروك بالبيت
عجينة المعروك
1 كيلو طحين (10كاسات) ، (أبيض زيرو تحديدا يكون بروتينو عالي).
200غ سكر (كاسة وربع).
ملعقة صغيرة محلب (2غ).
ملعقة صغيرة شمرة (2غ).
ظرف خميرة 10غ.
1ظرف بيكنغ بودر 5غ.
ظرف فانيليا.
25 غ زبدة ملعقة كبيرة ، تعطي طراوة ونعومة.
2 بيضة.
2 كاسة مي أو حليب للعجن.
حشوة جوز الهند
2 كاسة جوز هند.
كاسة زبيب.
كاسة إلا قليل مربى مشمش.
2 ملعقة زبدة كبار أو سمنة.
2 ملعقة سكر.
حشوة العجوة
تمر عجوة شقرة.
معلقة سمنة حلوب أو نباتي.
حشوة الشوكلاتة
شكلاتة سائلة أو حرارية.
معلقتين مي.
طريقة تحضير المعروك
أولا بنجيب الطحين وبنضيف عليه السكر والمحلب والشمرة ، وهدول هني أصل نكهة المعروك. وظرف الفانيليا وظرف الخميرة وظرف البيكنغ بودر.
بعد ذلك نضيف الزبدة والبيض والحليب والمي ، بنقدر نعجن العجينة بس بحليب سائل أو نضيف حليب بودرة ونعجن بمي ، ولا بأس إذا خلطنا بينهم مثل ماعملت بالفيديو.
نبدأ نعجنهم ، وكلما دعكنا العجينة أكتر كلما كانت النتيجة أفضل ، حتى تصير عجينة ناعمة كتير ، ومنشان تنعم أكتر بنعمها بمعلقتين زيت نباتي.
نقسم العجينة لأقسام بوزن ١٥٠غ ، وبنتركها تختمر وهي الخطوة ضرورية لعجينة المعروك.
بينما تخمرت العجينة بنحضر الحشوات
لتحضير حشوة جوز الهند
بنجيب جوز الهند وبنضيف عليه السكر والزبيب ومربى المشمش والزبدة وممكن نستبدلها بسمنة ، بنحركهم لتصير معنا متل العجين.
لتحضير تتبيلة التمر العجوة
حبذا لو العجوة تكون شقرة طرية منشان ماتعذبنا ، بنضيف عليها سمن حلوب وإذا مو متوفر بنحط سمن نباتي ، وممكن نضيف ماء زهر ، ونخلطها حتى تصير معنا متل العجينة.
لتحضير حشوة الشوكلاتة
بنجيب شوكلاتة سائلة ولو متوفر شوكلاتة حرارية بيكون أفضل ، بنضيف عليها نقطتين مي ونحركها حتى تجمد وتصير معنا متل العجينة.
ندهن الطاولة شوية زيت نباتي ونفرد العجينة بالشوبك أو نكبسها بالإيد.
لمعروكة العجوة بنحط ٦٠ غ حشوة تمر ونرقها بشكل طولي ونحطها عالعجينة ، ونلف العجينة عليها ونمدها شوي متل ماهو موضح بالفيديو ، ونتأكد تكون القفله لتحت ، وبالمشحاف أو السكينة نقطع أطرافها ، نلزق أطراف العجينة ببعض ليصير عنا شكل دائرة ، ونغطي وشها بالسمسم.
وكذلك لمعروكة جوز الهند بنحط حشوة جوز الهند عالعجينة ونلفها ونتاكد من تسكيرها مزبوط مثل البقجة ، ونكبسها شوي ونغطي وشها بالسمسم.
وأخيرا لمعروكة الشوكلاتة بعد أن نفرد العجينة بنحط حشوة الشوكلاتة ونلفها ونسكرها ونختمها منيح ، ونلتها ب السمسم.
بنحطهم بصينية عليها ورق زبدة.
هلأ بنجي لمرحلة التخمير بالبخار
بنحط الصواني بالفرن المطفي وبنحط شوية مي مغلية بصينية بالرف التحتاتي متل ماهو موضح بالفديو ، لكن مانكتر مي حتى لا تكون الحرارة كتير عالية وتسيخ العجينة ، ونسكر عليهم الفرن ، بس يتضاعف حجمهم قبل مايتخمرو ١٠٠% بنطالعهم.
الآن بنشغل الفرن من فوق و تحت ع درجة حرارة ٢٠٠ مئوية. ممكن ندهن وجه المعروك ببيض.
ننزل الصواني على الرف الوسطاني بالفرن ، من ٥ ل ١٠ دقايق.
أول مابيطلعو من الفرن ندهنهم زبدة أو سمنة بتعطي زكاوة وطراوة وهشاشة. وممكن ندهنهم بشوية مربى مشمش ، ونزينهم على سبيل المثال بجوز هند وفستق. وصحة وهنا
ناطرين تعليقاتكم لنعرف تجربتكم بـ طريقة تحضير المعروك بالبيت ولا تنسوا تتابعونا على صفحتنا في فيسبوك
وبامكانكم التعرف على باقي الوجبات الرمضانية
عجينة برك بطريقة المورقة بخطوات سهلة وبسيطة
الخبز الحلو اطيب معروك لرمضان عجينة بريوش سحرية (بيتيبال)
