كنافة بالقشطة وسر لونها وتماسكها
المقادير :-
نصف كيلو كنافة.
كاسة سمن.
نصف كاسة صغيرة قطر.
مقادير القشطة:
نصف لتر حليب.
علبة كريمة 200 مل.
ملعقة كبيرة سكر.
نصف كوب سميد ( 3 أو 4 معالق كبار).
4 ملعقة كبيرة نشاء.
2 ملعقة زبدة (اختياري).
ظرف فانيليا (اختياري).
كم نقطة ماء زهر (اختياري).
طريقة التحضير :-
أولا علينا أن نطبخ القشطة :
بطنجرة نحط الحليب ونضيف عليه السميد والنشا والسكر وحتى نحصل على قشطة دسمة أكتر نضيف كريمة الطبخ ، نحركهم عالبارد ومن ثم نشغل النار حتى تغلي.
لما تبدأ تغلي نشيلها من على النار ونضيف المنكهات حسب الرغبة ، على سبيل المثال : الفانيليا ، ماء الزهر ، وأيضا نضيف الزبدة حتى تعطيها دسامة أكتر ، بعد ذلك نرجع نحطها على النار حتى تدوب الزبدة ويمتزج ماء الزهر مع الفانيليا ، وبنضل نحرك حتى تغلي ، كلما خليناها تغلي أكتر كلما كانت النتيجة أفضل و طلعت ريحة القشطة والحليب.
هي الغلوة بتخلي الحليب يشوط وبالتالي يعطي النكهة الخارقة للقشطة وهي سر من أسرار شغل المطاعم ، بنطفي عليها ونسكبها حتى نبردها ، حتى ماتطلع طبقة قشرة على الوجه ندهن ايدينا سمنة البقرة الحلوب ونكبس على وجهها حتى لا تنشف وتطلع قشرة.
القشطة هي ممكن نستخدمها بحلويات الفرن على سبيل المثال : الوربات والكنافة ، وحتى الحلو البارد كحلاوة الجبن وغيرها.
من ثم علينا أن نحضر القطر حتى يدفى ريثما جهزنا الكنافة.
أي أكله فيها قشطة ننزل عليها القطر على البارد تحديدا مو على السخن.
لتحضير القطر السميك :
بطنجرة على البارد نحط الماء والسكر ونشغل عليهم الغاز ، نقلبهم تقليبة بسيطة صغيرة حتى نتأكد أن السكر ماترسب لتحت وعم يتحرك تمام ويدوب ، بعد مايغلي القطر غلوتين تقريبا نحط إما شرحة ليمون أو ملح الليمون ، ومن ثم نتركهم دقيتين إلى 3 دقايق يغلو وطفي تحتهم.
وبالنسبة لحجم الصينية المستعمل 32 سم ، يفضل تكون صينية نحاس ، أو أي صينية متوفرة متل صينية البيتزا.
بعد ذلك ننتف الكنافة ، ممكن نفرفدا وننتفها باليد ومن ثم نضيف عليها سمنة ونحطها على الصينية ونكبسها.
أو نقطعها ونفرمها على الناعم بالسكين ، أو نفرمها بمحضرة الطعام 5 دقايق ، بعد ذلك نخلط على جمب السمنة والقطر ، حتى يدوبو منيح ، ونوزعهم على الكنافة ونقلبهم حتى توصل السمنة والقطر على الكل.
ممكن نستبدل القطر بالسكر ولكن القطر أفضل.
السمنة دايبة فاترة ولكن ماعم تغلي.
هي الطريقة أسهل وأسرع حتى تنجح بالبيت 100% ولئلا نستهلك سمنة كتير ونصفيها.
من ثم ندهن الصينية بكمية منيحة سمن حيواني البقرة الحلوب ، وإلا الكنافة بتلزق.
نوع السمنة المستخدم حسب الرغبة سواء كانت حيواني أو نباتي ، ولكن حتى نحصل على طعم طيب للكنافة حطيت سمنة نباتي نوع أول جيد ونكهتها ظريفة وطيبة.
نقسم كمية الكنافة لنصفين ، نفرد النص الأول بالصينية بشكل متساوي ونبعي كل الفراغات ونضغط على الكنافة باليد ، بعد ذلك نغطي الصينية بنايلون ونضغط عليها إما باليد أو بصينية نفس المقاس أو أي شي تقيل متوفر ل5 دقايق تقريبا ، كلما ضغطنا بقوة أكتر كلما كانت النتيجة أفضل وطلعت الكنافة قطعة وحدة.
بعد ذلك بنجيب القشطة وندعكها ، من ثم ممكن نقسمها قطع صغيرة ونفردها على الكنافة بمستوى واحد ، أو نفردها على نايلونة ونقلبها ، نبلل ايدينا بالمي ونكبسها ، علينا أن نترك مسافة فارغة للأطراف حتى نحط فيها كنافة.
نرجع نحط على الأطراف الكنافة وبعد ذلك نغطي وجهها أيضا ، نغطيها بنايلون ونكبسها عالخفيف كذلك بصينية أو أي شي تقيل ، ننتبه مانضغط بقوة كتير متل المرة الأولى لأن حطينا القشطة.
الآن نشغل الفرن من فوق وتحت على درجة حرارة 200 مئوية ، نحط الصينية على آخر رف من تحت وبعد 10 دقايق ندورها على الجهة الثانية من أجل أن تتوزع الحرارة على كل الصينية.
بعد 15 دقيقة نتأكد إذا صار لونها أشقر من الأطراف يعني منيح ، نطلعها ونحررها من الصينية بدقها بطرف الطاولة ونقلبها ، نرجعها على الفرن ونطفيه من فوق حتى يأخذ سفلها اللون لمدة 5 دقايق.
بعدما طلعناها من الفرن نصب القطر البارد عليها بمصفاية ناعمة ونوزعه بالمشحاف ، طبعا كمية القطر اختياري حسب الرغبة ، وسطيا 3 مغارف قطر.
الأفضل نبردها نص ساعة بعد ذلك نقطعها حتى تأخذ الشكل المناسب ، لأن القشطة فيها سخنة.
سر قرشة الكنافة بالسمنة والقطر ، لأن السمنة هي دهون فقط فهي عم تتقلى بالفرن ، أما الزبدة لأنها تتكون من دهون وسوائل إما حليب أو ماء ، فلما تسيخ بالفرن رح تطلع السوائل من الزبدة وتطري وترطب الكنافة بالتالي رح تخفي القرشة.
وممكن نسويها على الغاز ولكن عملية قلبها على الغاز صعبة.
